In Orgòsolo su gustu est una gianna de intrada a sa cultura sua.

Unu giru enogastronòmicu no est petzi una pasada de gula, ma una manera de atraessare cun sos sensos s’istòria e s’identidade de unu territòriu ligadu a fundu a sa terra sua.

Si partit dae sos casos, sìmbulu de sa cultura de sos pastores de sa bidda. Sos recotos friscos ispantant pro sa delicadesa issoro, e su recotu Mustia, unu pagu afumadu, ti nche faghet torrare deretu a sos cuiles de monte. Sos pecorinos, dae sos prus giòvanos a su Semicotto finas a su Fiore Sardo, ti dant, mussu a pustis de mussu, s’essèntzia de sa vegetatzione de su logu, cun nuscos craros de armidda e de frore de Santu Giuanne.

Sas duas cantinas de Orgòsolo traballant in artu, finas a 700 metros, sighende pràticas chi preferint su traballu a manu e su rispetu de s’ambiente. Sos binos sunt frutu de un’agricultura cuidadosa, cun fermentos de su logu e interventos mìnimos. In prus de su Cannonau, inoghe si podent iscobèrrere variedades antigas e pagu connotas, comente sa Granatza e su Sangue di Cristo.

Fintzas sos licores naschent dae connoschèntzias artesanales e dae prantas agrestes collidas in un’ambiente galu intreu. Frore de Santu Giuanne, fenugru agreste, murta bianca e niedda e fintzas tzafaranu: cada essèntzia contat una parte de su paesàgiu e de sas istajones.

Sa coghina orgolesa at sas raighinas in sa traditzione de sos pastores e de sos massajos. Intre sas ispetzialidades, sa purpuza, petza de sartitza coghinada chene budellu e isfumada cun su binu, est protagonista de primos pratos licantzos o mandigada sola comente màndigu de carrera. Su raviolone, unu culurgione mannu ùnicu de Orgòsolo, ammentat in sa forma una sebada. Su prenu clàssicu aunit presutu de su logu, casizolu e beda agreste, ma non mancant versiones cun cardulinos e casu. Balet sa pena a provare fintzas sa pizza de Su Lizu, in ue sa chirca de ingredientes seberados s’addòbiat cun impastos a fermentatzione longa e farinas de calidade.