S’escursione prus clàssica giughet a iscobèrrere su Padente de Montes, àrea de interessu naturalìsticu mannu, regnu de s’àbbila reale e de sa muvra.

Sa prima pasada est in sa bena de Funtana Vona, in ue naschet su riu Tzedrinu chi, a pustis de un’àndala a tortu de 80 km, arribat a sa costa de Orosei.

Dae sa funtana s’àrtziat in su costàgiu de nord de su Monte Fumai pro arribare a sa punta, a 1316 metros de artària. S’achirrada intrat deretu in su padente, pro arribare, in sa tapa a pustis, a su profilu inconfundìbile de su Monte Novu Santu Juvanne. A sa punta sua s’arribat cun un’àndala chi dae su cumintzu dat vistas largas. Sa mirada arribat finas a sa punta de su Corrasi, sa punta prus arta de su Supramonte, lompet a sa gula de Gorropu e, a largu, a sos montes de su Gennargentu.

In giosso s’isterret su Padente de Montes, e a largu su padente primàriu de èlighe de Sas Baddes, intre sos prus de importu de Europa, dae ue nch’essit a pìgiu su Nuraghe Mereu.