Bive sa traditzione cada die
Inoghe sa traditzione no est un’ammentu prenu de prùere e ne un’atratzione de cartolina.
No abarrat serrada in sos museos, non s’allughet petzi in sas dies de festa. Bivet, si movet, est bia in sas carreras, in sas manos chi impastant, in sas boghes chi s’intritzant.
Su pastoriu no est folclore, est su ritmu de cada die. Su tàgiu andat a in antis in sas pasturas, su late si faghet casu e su tziclu sighit, chene interrutziones, chene cuntzèdere nudda a sa presse. E a pustis b’at sa mùsica. Su cantu a tenore non tenet bisòngiu de istrumentos, petzi de òmines chi s’ascurtant, una boghe chi ghiat, sas àteras chi rispondent. Est unu sonu primitivu, chi tremet in s’àera e t’intrat in sas petorras.
E cando su fogu de Santu Antoni de su Ohu illùminat s’ierru, cando su beranu aunit sa comunidade, cando sa festa de Nostra Sennora de Mesaustu prenat sas carreras de cantos e de caddos, cumprendes chi non sunt eventos ebbia. Sunt raighinas chi istringhent forte, filos chi ligant su tempus coladu a su presente.
Inoghe fintzas su bestire traditzionale est prus de unu bestire: est identidade cosida a pitzu. Su mucadore de colore ocra de sas fèminas, su gipone ruju de sos òmines: cada pinniga, cada colore contat un’istòria chi nemos tenet intentzione de ismentigare.
In Orgòsolo sa traditzione non s’abbistat dae indedda. Ti imbòligat, ti isfidat, ti mutit a intrare. Bastat a b’èssere.
ITE BÌDERE
SAS CARAS DE ORGÒSOLO
A bortas, una mirada balet prus de milli paràulas.