Orgòsolo no est unu logu in ue s’arribat pro casu.

Est una bidda a ue s’arribat ca s’issèberat. Ca unu tenet gana de essire dae sos caminos de totus, de si nche lassare a palas sos tzentros prenos de gente e de andare a s’addòbiu de un’àtera cara de sa Sardigna.

Semus in su coro de sa Barbàgia, in unu territòriu chi at bìvidu semper unu pagu a banda. Non semus indedda in lìnia de àera, ma su biàgiu cheret tempus, cara, gana de andare prus a bellu. E forsis est pròpiu custu chi faghet de s’arribu una cosa chi s’ammentat.

In màchina

Est su mèdiu prus còmodu pro arribare a inoghe e pro si mòvere una borta arribados. A segunda de su logu de tzucada, custas sunt sas àndalas printzipales:

• Dae Nùgoro (pagu prus o mancu 18 km, 20-25 minutos) – Sighi sa SS 129 cara a Macumere finas a Locoe, a pustis gira in sa SP 58 pro Orgòsolo.
• Dae Casteddu (pagu prus o mancu 165 km, 2 oras e 15 minutos) – Piga sa SS 131 cara a Tàtari/Nùgoro. A s’artària de Abbasanta, intra in sa SS 131 DCN cara a Nùgoro. Essi in Nùgoro e sighi in sa SP 58 pro Orgòsolo.
• Dae Terranoa (pagu prus o mancu 115 km, 2 oras) – Piga sa SS131DCN cara a Nùgoro. Cola su bìviu pro Nùgoro tzitade e sighi finas a s’essida pro Orgòsolo, a pustis sighi sos inditos in sa SP 58. 

Una borta arribados, parchègia in sas carreras printzipales. Su tzentru tenet carreras astrintas, imperdadas e a bortas in pigada. Est pensadu pro èssere bìvidu a pee, a discansu.

Cun sos mèdios pùblicos

B’at una lìnia ARST chi collegat Nùgoro a Orgòsolo. Sos collegamentos non sunt fitianos meda, duncas est mègius a controllare sos oràrios in antis e a programmare su biàgiu cun tempos de pasu.

S’aeroportu prus a curtzu est su de Olbia – Costa Smeralda, a pagu prus o mancu 115 km. Su portu prus còmodu est semper su de Terranoa, cun collegamentos regulares in totu s’annu cun sas tzitades printzipales de su tzentru-nord de s’Itàlia. In alternativa, in s’istajone de s’istiu, si podet arribare fintzas a su portu de Arbatax, prus a curtzu ma cun servìtzios prus pagu fitianos.

Pro bìvere Orgòsolo e sos logos a inghìriu cun prus libertade, ti cussigiamus de afitare una màchina, mescamente si biàgias foras de istajone o si cheres esplorare sos tretos prus pagu servidos dae sos trasportos pùblicos.