Su Museu de su Pane de Orgòsolo est in Cursu Repubblica, sa carrera printzipale de sa bidda. Su museu est in un’edifìtziu de belle duos sèculos, cun sos ùrtimos arrastos documentados de su 1848. S’istrutura, intrea in s’autentitzidade sua, est un’esèmpiu de architetura traditzionale de cussu perìodu, cun aposentos chi cunservant sa funtzione originale issoro.

S’àndala espositiva tenet bator aposentos in ue sunt regortas sas ainas traditzionales impreadas pro fàghere su pane tìpicu de Orgòsolo, Su Pane Tostu (pane carasau) e S’Ispianada (ispianada). A costàgiu de sa mustra de sas ainas, su museu proponet unu curtzumetràgiu chi torrat a contare totu sas fases de su fàghere de su pane, interpretadu dae tres fèminas antzianas de sa bidda in bestire traditzionale.

In prus de sa parte dedicada a su pane, su museu cunservat àteros ispàtzios de domo de cussu tempus: un’aposentu de letu matrimoniale chi si narat “sa camera de lettu”, un’aposentu de acasàgiu “sa huhina” e una corte coberta “sa horte”. Custos ambientes, cun sa mobìlia de cussu tempus, dant s’idea de comente fiat organizada sa vida de cada die de una famìlia orgolesa in s’Otighentos.

Un’aspetu de importu de su museu est ligadu a s’acasàgiu, traditzione raighinada in sa comunidade nostra. Cun custu ispìritu, in sa bìsita si podet assagiare su pane carasadu acumpangiadu dae casu fatu dae sos pastores de su territòriu, pro un’esperièntzia chi aunit istòria, cultura e gustos genuinos.

Pro àteras informatziones e pro prenotare mutide su +39 3495136187