S’àrea archeològica de Sirilò est a pagu prus o mancu bator chilòmetros a sud de Orgòsolo, in pitzu de unu monte de granitu chi nche colat sos milli metros de artària. Dae in cue in susu, sa mirada abbratzat unu paesàgiu largu: a levante si reconnoschet su Supramonte de Ulìana, a sud sos cùcuros de su Gennargentu, e cara a ponente essint sas coberturas de Fonne e, prus a nord, sa badde chi giughet a Nùgoro.

In pitzu de su monte b’at sos arrastos de unu nuraghe fatu cun blocos mannos de granitu. De sa turre antiga si distinghent sos primos filos de perdas e s’intrada a trapètziu cun s’architrave galu in logu. A inghìriu s’isterret una bidda cun una bindighina de pinnetas e, unu pagu prus a giosso, una necròpoli cun 13 domos de janas iscavadas in sa roca.

Sas tumbas sighint s’inclinatzione naturale de su terrinu, cun prantas simpres e diferentes. Unas cantas tenent elementos architetònicos prus elaborados, comente alcovas artziadas, bancos, curnisas, cupeddas e iscanaladuras. In unas cantas pinnas de muru si bident galu arrastos de ocra ruja, ma non b’at sìmbulos decorativos.

Intre sas costrutziones prus particulares nd’essit a pìgiu unu tèmpiu minore, fatu in parte subra de una tumba chi b’aiat giai. Est fatu de un’aposentu tzilìndricu e de unu vestìbulu, in ue si distinghent galu sas bases de sas banchitas apojadas a sas pinnas de muru. A sud de s’aposentamentu, belle cuadu intre sa vegetatzione, b’at unu dolmen.

Sos materiales agatados in sas pinnetas, fintzas de orìgine etrusca e greca, allegant de unu logu frecuentadu pro tempus meda e de una fase de càmbiu culturale, a cumintzare dae s’edade de su Ferru.